December 25, 2018
ትንተናዊ ንባብ ንመደረ ኣባል ሃገራት
ባይቶ ጸጥታ፡ እገዳ ካብ ኤርትራ ድሕሪ ምልዓሉ
ብዶ/ር ኣሕመድ ሓሰን ድሕሊ
ብ14 ሕዳር 2018 ኣምባሳደራት 15 ሃገራት ኣባላት ባይቶ ጸጥታ [ሕቡራት መንግስታት ኣሜሪካ፡ ሩስያ፡ ቻይና፡ ብሪጣንያ፡ ፈረንሳ፡ ኢትዮጵያ፡ ፖላንድ፡ ቦሊቭያ፡ ፔሩ፡ ሽወደን፡ ኢኳቶርያል ጊኒ፡ ካዛክሳታን፡ ኣይቮሪኮስት፡ ኩዌትን ሆላንድን] ነቲ ብብሪጣንያን ሰሜን ኣየርላንድን እገዳ ካብ ኤርትራ ንምልዓል ዝቀረበ እማመ ውሳነ ቁጽሪ 2044 ኣብ መጋባእያ ቁጽሪ 8398 ተመያዪጠን። ነቲ መጋባእያ ዝመርሐ ቻይናዊ ኣምባሳደር ማጃውሹ “ ብመሰረት ውሽጣዊ ሕጊ ባይቶ ጸጥታ ዓንቀጽ 37 ወከልቲ ጂቡቲ፡ ኤርትራን ሶማልን ኣብዚ መጋባእያ ክሳተፉ እጽውዕ” ኢሉ። [1] እቲ እማመ ድማ ኢድ ብምልዓል ንድምጺ ቀሪቡ። ብኩለን ኣባል ሃገራት ባይቶ ጸጥታ ስለዝተደገፈ ኸኣ ከም ውሳነ ኣህጉራዊ ባይቶ ጸጥታ ቁጽሪ 2444 ኮይኑ ብወግዒ ሓሊፉ።
