April 22, 2022
ቀዳሞት ግጥማት ሓርነታዊ ቃልሲ
9ይ ክፋል
መምህር ነጸረኣብ ኣዛዚ
ምትሓዝ ፈዳይን ኣብ ኣስመራ ሰነ 1963
መራሒ ተመሃሮ ካይሮ ዝነበረ፡ ስዒድ ሑሴን ካብ ግብጺ እቲ ቀዳማይ ንሜዳ ዝተሰለፈ እዩ። ሓደ ካብቶም ስርሒት ፈዳይን ኣቑርደት ዝፈጸሙ እውን እዩ። ብዘይካ’ዚ ኣብ ኣዲስ-ኣበባ ውድብ ሓድነት ኣፍሪቃ መስራቲ ኣኼባ ኣብ ዘካይደሉ ዝነበረ ሰነ 1963፡ ኣቓልቦ ማሕበረሰብ ዓለም ንምስሓብ፡ ምስ ማሕሙድ ሃሩን ዝተባህለ ተጋዳላይ፡ ኣብ ኣስመራ ስርሒት ንምፍጻም ተበገሰ። ዒላማኦም መዕርፎ ነፈርቲ ኣስመራን መመንጨዊ ሓይሊ ኤለክትሪክ ሴዳውን ነበረ። ግን ኣይተዓወቱን። ዝደርበዩወን ቦምባታት ርሒቐን ስለዝተፈንጀራ፡ ኣብ ልዕሊ’ተን ለም ኢለን ዝነበራ ነፈርቲ ክሳራ ኣየውረዳን። ኣብ ሰበስልጣን ኢትዮጵያ ዝፈጠሮ ስንባደ ግን ቀሊል ኣይነበረን። እዞም ክልተ ፈዳይን፡ ድሕሪ’ቲ ስርሒት፡ ብሰንኪ ሓደ ክተሓባበሮም ኢሎም ምስጢሮም ዘካፈልዎ ሰብ ተታሒዞም እዮም። ስዒድ ሑሴን ድማ ብወተሃደራት ተዓጂቡ፡ ናብ ቦታ ፍጻመ ተወስደ። እቲ ውጥን ምስ ገለጸሎም፡ ብትብዓቶም ተደነቑ። ሓደ መዓልቲ ቅድሚ ስርሒት ናብ መኪና ኣዛዚ ካልኣይ ክፍለ ሰራዊት ኢትዮጵያ ዝደርበይዎ
