December 21, 2024
ገበናት ኲናት ኢትዮጵያ ኣብ ልዕሊ ህዝቢ ኤርትራ
ኣብ ኣዲስ ኣበባ ስልጣን ዝሓዙ ስርዓታት ኢትዮጵያ፡ ካብ ዘመነ መስፍናዊ ስርዓት ሃይለስላሴ፣ ውልቀ መላኺ መንግስቱ ሃይለ ማርያምን ዓሌታዊ ስርዓት መለስ ዜናዊን ጀሚሮም፣ ናይ ምጽናት ፖሊሲ ብምኽታል፣ ኣብ ልዕሊ ህዝቢ ኤርትራ፡ ገበናት ኲናት ፈጺሞም፣ ንህዝቢ ኣህሊቖም፣ ኣማዛናቢሎም፣ ከተማታት ኣዕንዮም፣ ዓድታት ኣንዲዶም፣ ቁጠባ ኣዕንዮምን ከብቲ ኣጽኒቶምን። ክሳብ’ዚ እዋን’ዚ ካሕሳ ይትረፍ ንህዝቢ ኤርትራ ይቕሬታ’ኳ ኣይበሉን። ሎሚ፣ ብደራሲ ነጸረኣብ ኣዛዚ “ዖናን በስክዲራን – ህልቂት ዓድታት ሰንሒት 1970-1971” ብዝብል ኣርእስቲ ተጻሒፋ፣ ኣብ ታሕሳስ 2024 ዝተሓትመት መጽሓፍ ንገምግም ኣለና።እዛ መጽሓፍ እዚኣ ጥማዕ ናይቲ ኢትዮጵያ ኣብ ልዕሊ ህዝቢ ኤርትራ ዝፈጸመቶ መግዛእታዊን “ዶባዊን” ገበናት ኲናት ኮይና ነቲ ፍጻመ ብዝርዝር እተቕርብ እያ።
