ጋዜጣዊ መግለጺ
ኤርትራዊ ዜጋ ኣብ እስራኤል “ብጌጋ” ተቐቲሉ

ሓያሎ ማዕከናት ዜና፡ ንዘሰቅቕ ቅትለት ኤርትራዊ ዜጋ ብዓረር ወተሃደር እስራኤል ኣብ ከተማ ብእር-ሼባ ሎሚ ከጋውሕኦ ውዒለን ኣለዋ። እቲ ጭካነ ዝመልኦ ማህረምትን ቅትለትን ናይ’ቲ ኤርትራዊ ዜጋ፡ “ብጌጋ” ከምእተፈጸመ’ዩ ተገሊጹ። ሰብ-መዚ እስራኤል’ውን ናብ ኤምባሲ ኤርትራ ናይ “ጽንዓት ይሃብኩም” መልእኽቲ ሰዲዶም ተባሂሉ’ሎ።

እቲ ጉዳይ፡ ነቲ ኣብ ልዕሊ ሰላማውያን ሰባት ዝፍጸም ዘሎ ዘስካሕክሕ ግፍዒ መሊሱ ዘጒልሕ እንተዘይኮይኑ፡ ኪጒልብብ ኣይክእልን። ንኤርትራ ብሕልፊ፡ እዚ ፍጻመ’ዚ፡ ነቲ ኣብ ልዕሊ ዓሰርተታት ኣሽሓት ኤርትራውያን ዝፍጸም ዘሎ ዕቡጥ ግፍዒ መዘኻኸሪ’ዩ።

እዚ “ብጌጋ” ተቐቲሉ ዝተባህለ ኤርትራዊ፡ ሓደ ካብቶም ብዝተወደበ ዓለማዊ ገበን ፍልሰት፡ ፖለቲካዊ መጋበርያን ከደምቲ ሕሱር ዕዮን ክዀኑ ንእስራኤል ከምዝስደዱ ዝተገብሩ ኤርትራውያን ስለዝዀነ፡ በዚ ኣጋጣሚ’ዚ ህዝብን መንግስትን ኤርትራ ብዛዕባ’ቲ ተርእዮ ሻቕሎቶምን ኲነኔኦምን ደጊሞም ይገልጹ።
ሚኒስትሪ ዜና
ኣስመራ
19 ጥቅምቲ

ገበናት ኲናት ኢትዮጵያ ኣብ ልዕሊ ህዝቢ ኤርትራ